ភ្នំពេញ ៖ អភិបាលនៃគណៈអភិបាលរាជធានីភ្នំពេញ លោកប៉ា សុជាតិវង្ស បានបញ្ជាក់ថា ទូបើកលុយATM នៅតាមទីសាធារណៈទាំងអស់របស់ធនាគារឯកជនប្រឈមមុខនឹងការលុបបំបាត់ចោលទាំងស្រុង ដោយសារតែមិនមានអ្នកការពារ និងមើលថែឲ្យមានសុវត្ថិភាព បណ្ដាលឲ្យមានបទល្មើស បង្កអសន្តិសុខដល់សង្គម។
លោកប៉ា សុជាតិវង្សបានបញ្ជាក់បែបនេះក្នុងកិច្ចប្រជុំគណៈបញ្ជាការឯកភាពរាជធានីភ្នំពេញ កាលពីរសៀលថ្ងៃទី២០ ខែមីនា ឆ្នាំ២០១៧ ដោយមានការចូលរួមប្រជុំពីមន្ត្រីក្រោមឱវាទ កម្លាំងប្រដាប់អាវុធទាំង២ប្រភេទ មន្ទីរពាក់ព័ន្ធ និងស្ថាប័នតុលាការផងដែរ សំដៅធ្វើយ៉ាងអនុវត្តឲ្យបាននូវគោលនយោបាយទាំង៩ចំណុចរបស់ភូមិ សង្កាត់មានសុវត្ថិភាព ដែលបានដាក់ចេញដោយរដ្ឋាភិបាល។
លោកប៉ា សុជាតិវង្ស បានមានប្រសាសន៍ថា ទូដកលុយATM គួរតែលុបបំបាត់ មិនឲ្យដាក់នៅតាមទីសាធារណៈនោះទេ បើមិនមានអ្នកការពារ អ្នកមើលថែ បង្កឲ្យមានបទល្មើស តែទូបើកលុយនេះ បើអាចចល័តបានអនុញ្ញាត ដូច្នេះទេមន្ត្រីនិងសមត្ថកិច្ចយើងត្រូវសិក្សារួមគ្នាមួយ ដើម្បីលុបបំបាត់ ដោយលោកលើកឡើងថា ការផ្ទុះទូATMនៅមុខពេទ្យកុមារជាតិវាជារឿងមួយថ្មី ដែលក្នុងនាមអាជ្ញាធរ កងកម្លាំងមានសមត្ថកិច្ច ត្រូវតែបង្ការ និងទប់ស្កាត់កុំឲ្យកើតឡើងទៀត។ នេះវាផ្ទុះតែមួយទូចុះបើទូទាំងអស់នៅតាមទីសាធារណៈត្រូវបានក្រុមជនល្មើសដាក់បំផ្ទុះនោះវានឹងបង្កចលាចលពេញក្រុងទៅហើយទេ។ ដូច្នេះទេត្រូវតែសិក្សារួមគ្នាមួយឲ្យច្បាប់មុននឹងឈានដល់ការលុបបំបាត់ចោល ទូបើកលុយATM នៅតាមទីសាធារណៈទាំងអស់នេះ។
គួររំលឹកផងដែរថា កាលពីវេលាម៉ោង១២និង៤៥នាទី រំលងអធ្រាត្រ ឆ្លងចូលថ្ងៃទី១៨ ខែមីនា ឆ្នាំ២០១៧ មានការភ្ញាក់ផ្អើលឡើងមួយ បានកើតឡើងដោយជនសង្ស័យម្នាក់បានដាក់បំផ្ទុះទូបើកលុយATM នៅចំណុចមុខមន្ទីរពេទ្យកុមារជាតិ តាមបណ្តោយផ្លូវសហព័ន្ធរុស្ស៊ី ស្ថិតក្នុងសង្កាត់ទឹកល្អក់១ ខណ្ឌទួលគោក បណ្តាលឲ្យម៉ាស៊ីន ATM ដកលុយរបស់ធនាគារកាណាឌីយ៉ា បែកបាក់ផ្ទុះកញ្ចក់ប៉ើងចេញមកក្រៅខូចខាតស្ទើរទាំងស្រុង តែមិនទាន់បែកដល់កន្លែងដែលផ្ទុកលុយនោះទេ។
ជុំវិញហេតុការណ៍ខាងលើនេះ ក្រោយពីសមត្ថកិច្ចមូលដ្ឋាន គ្រប់ជំនាញពិនិត្យកោសល្យវិច្ច័យ និងស៊ើបអង្កេតរួចមក ទើបដឹងថា មាន បុរសមិនស្គាល់អត្តសញ្ញាណម្នាក់ ត្រូវបានសមត្ថកិច្ចដាក់ការសង្ស័យថា ជាអ្នកធ្វើសកម្មភាពបំផ្ទុះទូATM នេះតែម្តង។ ការសង្ស័យនេះបានធ្វើឡើង បន្ទាប់ពីសមត្ថកិច្ចបានពិនិត្យឃើញនៅក្នុង កាមេរ៉ា នៅកន្លែងកើតហេតុ បានបង្ហាញថា បុរសមិនស្គាល់អត្តសញ្ញាណនោះ គឺជាជនសង្ស័យទី១ ដែលបំផ្ទុះទូ ATMនេះ។
លោកប៉ា សុជាតិវង្ស បានដាក់ការសង្ស័យលើករណីនេះថា ជនសង្ស័យអាចមានចេតនាចង់បានលុយពីទូដាក់លុយATMនេះ តែក្រោយការផ្ទុះហើយនៅមានឮសំឡេងរោទ៍ ម្យ៉ាងមានការភ្ញាក់ផ្អើលខ្លាំង ហើយសមត្ថកិច្ចក៏មកដល់ដែរនោះ ទើបជនសង្ស័យម្នាក់នោះគេចខ្លួនបាត់តែម្តង។
ប្រភព កម្ពុជាថ្មី ដេលី
